Ang bango-bango ko sa pang-amoy
ng dalawa kong ama
Dalawa, dalawa lang kami
ni Kuya
Buo ang buntot ko
kulay abo at mahaba
Habang ang kahel na
buntot ng kapatid ko
ay putol na parang tisa
na laspag na pagdating
ng Biyernes at
pinatatakam ang pisara
Ang bango-bango ko sa pang-amoy
nila
Ang balahibo kong kulay
abo, itim, at puti
ay sing-kinang ng iyaking
mga mata
Balingkinitan ang aking
katawan
perpekto sa mata ng lipunan
Habang ang kay Kuya naman
ay magulong mga hibla
nakapulupot sa mataba
niyang katawan
tila marungis na gintong
milyones ang halaga
Ang bango-bango ko sa pang-amoy
nila
Dahil ang mga halik
ng mababantot nilang mga labi
ay sa balahibo lamang
ng kapatid ko dumadampi
xxx